Diengen dank ik meegemakt en

Gegevens

Categorie: Uncategorised

Gepubliceerd: donderdag 07 februari 2013 13:02

Geschreven door Den Ertelijken

Hits: 5541

Menschen,

'k Gon junder e ki 't ain en 't ander verteln uut mien riek gevulde carrière ols muzikant. Ik en vele dwoaze stoten meegemakt, en 'k wiln junder dor nu en ton e ki dailachtig an maken, wa peis je?

Nu, voe te begunnen, 'k werkteg ik vele met e vintje, E'tje gom em aiten, en je weundeg ie ook in Ostende. Nu, E'tje was e hail goe muzikant, goed op ze saxofong en ze klarinette en op ze fluute kosten ook ze plang trekken, je speelde zelfs op e (zelve gemakte) panfluute.   't Ainigste noadail daj aat met E'tje was: je was getrouwd met een echte drake, en wat datter nog slichter was, je waster lik preus op, je bofteg ie dermee datten nie mocht smoren, dasse zaagde otten e pientje droenkt, alli gow, 't was dus in ord' ee.  

E ki ter illustroasje: op e dag giengt uuze bassist e kir achter em, 't regende dat zikte, je belt an E'tje ze deure en ze wuuf doet open, en direct "E., 'tis voe joen!!!!!!", KNOTS! de deure voor de bassist ze muule, en je stoeg ie dor in de gietende regen. Da was mor e ki voe te togen oe dattet der oengeveer an toe giengt in E'tje ze menoage, mo sebiets gojje dor wel mair over oren.  

Nu, met E'tje wast gin problaim omme buuten Ostende speelde, ze drake wist ton nie wor datten zat, en dor kosten e bitje mair ze gedacht doen ee, en sommige momenten wast lik e goocheloare in plekke van e muzikant: je giengt ie in de voeringe van de kiste van ze sax, en, "zwiep", e sigrette doaruut. Of voor damme begosten, e sigrette uut de puupe van ze sax of van tusschen ze kleppen, overal aaten ze weggestoken. (J' aat e poar overbruggiengen in zen erte get en dus mochten van ze wuuf nie mi smoren ee). En 'k gon nu nog e kir e poar belevenissen verteln dank meegemakt en onk met E'tje giengen gon speeln:

Ie en ik moesten e ki gon speeln in Oedeburg, ja, 't begost dor al goed wi: me kommen toe, en zeg E'tje "Ik gon e kir e Palmtje drienken", nu voe mien nie geloaten wi, je kost der ie mo deugd van en. En 't zaagt der nor uut dan de Palmtjes em smakten, want in een olf eure aten der azo al drieje bin. En ol met e ki vraagt der dor ain an uus "Go junder nog e twa drienken", en zegt E'tje: "me gon mo zeggen dat vandage Palmzundag is ee, gow, gif mo nog e Palmtje". Nu, voe mien nie geloaten wi, zoelange of datten ie ze werk dijt droenkt en ie zoevele of datten goest' aat, mo, ton gebeurde der 't volgende: E'tje moest e kir e pisje gon doen, je komt were, en met zoe e serieus aonzicht' ee: "'k Zien dor nu godverdomme me me kloten van de trap verdomd", si, da kwaamt dor zoe serieus uut ee, en de muule datten dorbie trokt ee, ik en ain van die inrichters, die juuste e woordje ant babbeln woaren, me zagen makoar nie mi stoan van lachen. En voe mien was 't nog komieker, want 'k kendeg ik E'tje al joaren en 'k wisten datten ie normaal zelden vloekte, dus je moe nie vragen ee. En nog beter, want j'aat in tusschentied nog e poar Palmtjes achter ze kolle gegoten, je go nog e ki gon pissen,zegten "'k Zien godverdomme wel were met me kloten van de trap verdomd zeker", si, ik woaren deran ee, da kujje peizen.

Nu, al bie aal zieme ton nog goed tuus gegrakt, e bitj' anders dan die kir in Blankenberge, me moesten dor in de karnavalstoet gon speeln, en E'tje was ook mee,  ja, 't was buuten (met de Dixielandgroep), en 't was februoari, da was biettende koed, en vriezen en snaiwn, je moe nie vragen, me coulisse van me trombone begost vast te vriezen, best dan de dee van die karnavalgroep e bottel jeniever mee aan, jajaak, 'k en me der vaneigen mee verwarmd, mo ken der toch moen gebruuken voer op me coulisse te gieten of de deen gieng vastvriezen. En nateurlik, met da weer, m'aan aal kompasje met E'tje, en me zijn ook, och haire da vintje, j'is den oedsten van uus aal, en zoe e zwoaren operoasje get, opelijk volt da vintj' ier nie dood, joan, naven dada, wieder liepen dor krom en schaif lik e bend' oede zakken, en E'tje met ze klarinette "fluut fluut fluut fluut", lik e joenkeid van 20 joar. Enfin, 't was zoe gaistig nie omme nor uus kwaamn wi, 't aa were begunnen snaiwn, en de grote boane laag schone wit, vassche snaiw, 't aa nog gin ain ottoo voor me gereen, dus, je ku peizen in die blomsuuker raink ik an 5 per eure, 'k zien e kir of viere met me muule de tramrouten in gegoan, best dat loate 's nachs was en dan der gin trams rain.   Nu, me zien dor toch ook goed tuusgekommen aloewel dank peisde dat E'tje alle momente e twa giengt achterloaten in men ottoo.  

Mo gelik dank al gezeid aan, omme in Ostende speelde was dat e hail ander poar mouwen met E'tje wi: me mosten op e dag e ki speeln in de Langestroate en 'k giengen achter em, juuste E'tje en ik, dus, 'k moesten al elektronische drums gebruuken en met me lienkschen and op e keyboard ton nog zelve de bas speeln ook, bijst dank dus met me rechschen and piano moesten speeln (beperkt budget, zijn ze dor tegen. ).

Nu, zoe verre zoe goed, mor ol met e ki, 't was azo 10-5 voe twolve, begunt ten ie ze saxofong uutain t' aaln en weg te steken, 'k zeggen "ewel, wat is da nu me joen, wa gojje doen tè?", en zegten ie tegen mien "jamo, je kent gie mien situoasje ee, je wit dank moen te twolven tuus zien ee", en, ze kisje toe, en weg was E'tje, die kir aank em wel kun wurgen ee, want 'k zaten ik dor wi, en 'k mochten ollaine vors doen. Mo, dat is bielange nog 't ende nie, want, e por weken loater moenk were met E'tje speeln, en zegten tegen me "moej nu e kir e twa weten?", "'k woaren ik vuuf minuuten te loate en 't nachtslot (de kittienk) laag op". En 'k zeggen "ja, wat ejje ton gedoan?", "Ewel", zegten "'k en ton gebeld bie me dochter die boven uus weunt en zet zie mien bingeloaten". En je was ie dor lik were preus op ee.

Mo nu, e poar weken loater, me moen were achter E'tje, ik en de drummer, 't was nu met zien ottoo, en E'tje weundeg in e stratje van e dail van Ostende wor dander nog van die 'cafeetjes' woaren met schoon vlais achter de ruute, en 't was zoe intje recht over zien deure. "Si", zijt de drummer. "da wuuf aat da moeten lappen met mien ee, ewel, direct giengenk dor binnen gezeten en", zijten (en je waist no da 'cafeetje', zegten "ze zoe zie da gin twidde ki doen". Nu, spietig genoeg is E'tje ton e tied loater gestorven an een ertstilstand, mo 't toogt oe gairen gezien datten wel was, want hail de kerke zaat vul, nevest familie woarent aal muzikanten die dor zaten.   Nu, da was een aiste vertellienksje over de dwoaze stoten dank ik in me carrière ol tegen kwaamn, wordt oengetwieffeld vervolgd.

Den Ertelijken.